പാലോട്ട് തെയ്യം

വിഷ്ണൂവിന്റെ അവതാരമായ മത്സ്യത്തിന്റെ തെയ്യക്കോലമാണ് പാലോട്ട് തെയ്യം / പാലോട്ട് ദൈവം എന്നും അറിയപ്പെടുന്നു.
പാലാഴിക്കോട്ടു ദൈവംഎന്നതാണ് പാലോട്ട് ദൈവമായതെന്നു വിശ്വാസം. 
വ്രതമെടുത്തിരുന്ന ശേഷം തെയ്യം കെട്ടുന്നത് പെരുവണ്ണാൻ ആണ്.

ഈ തെയ്യം കെട്ടുന്ന  പ്രധാന കാവുകളാണ് കണ്ണൂർജില്ലയിലെ അഴീക്കോട് പാലോട്ട് കാവ്, കീച്ചേരി പാലോട്ടുകാവ് എന്നിവ.

ഐതിഹ്യം

പാലാഴിയിൽ അനന്തശയനത്തിലുള്ള മഹാവിഷ്ണുവിന്റെ പൊൻകിരീടം പരമശിവന്റെ അറിവോടെ ഗംഗ ഇളക്കിമാറ്റി. 
അത് പാലാഴിയിൽ കൂടി തിരകളിൽ സൂര്യനുദിച്ചപോലെ വിളങ്ങി ഒഴുകി നീങ്ങി ഏഴിമുടിമന്നൻ നഗരി കാണാൻ നൂറ്റെട്ടഴിയും കടന്ന് അത് അഴീക്കോട് എന്ന അഴീക്കരയിൽ വന്നടുത്തു. 
കരുമന ചാക്കോട്ട് തീയനും ചങ്ങാതിയായ പെരുംതട്ടാനും മീൻപിടിക്കാൻ വലയുമായി അഴീക്കര ചെന്നിരുന്നു.
വലവീശിയപ്പോൾ അതിലെന്തോ തടഞ്ഞതായി തോന്നി. 
പെരുംതട്ടാൻ ഇറങ്ങി നോക്കിയപ്പോൾ കണ്ടത് മുടിമുത്ത് കിരീടം ആയിരിന്നു. 
ഇരുവരും കൂടി അതുമായി തിരിച്ച് പോന്നു. 

കോലത്തിരി രാജാവിന്റെ പട നായരായ മുരിക്കാഞ്ചേരി നായരുടെ അരികിലാണ് അതു കൊണ്ടു വച്ചത്.
എല്ലാവരും അതു കണ്ട് അമ്പരന്നു.
ശീതികണ്ഠൻ തീയ്യനും പെരുംതട്ടാനും നിയോഗം വന്ന് ഉറഞ്ഞ് തുള്ളാൻ തുടങ്ങി.
മുരിക്കഞ്ചേരി നായർ കണിശനെ വരുത്തി രാശി വെച്ചു നോക്കി. 
ആ കിരീടം ദൈവക്കരുവാണെന്നും പാലാഴിക്കോട്ട് ദൈവമെന്ന പേരിൽ അതിനെ പൂജിക്കണമെന്നും ദൈവജ്ഞർ അറിയിച്ചു.

അണ്ടലൂർക്കാവ്, കീച്ചേരി പാലോട്ടുകാവ്, മാവിലാക്കാവ്, മേച്ചേരിക്കാവ്, അതിയിടത്ത്കാവ്, കുഞ്ഞിമംഗലത്ത് മല്ലിയോട്ട്കാവ് എന്നിവിടങ്ങളിൽ പാലോട്ട് ദൈവം എഴുന്നള്ളിയത്രെ.
തെക്കുംപാട്ടുകാവിൽ ഉത്സവം കാണാൻ ചെന്ന തണ്ടയാന്റെ കുടവഴിയാണ് പാലോട്ടുദൈവം അതിയടത്തുപുരയിൽ എഴുന്നള്ളിയത്.
തീയജാതിയിലുള്ള പടയംകോട്ടെന്ന തറവാട്ടിലെ മല്ലിയോടാൻ, അതിയടത്തു പാലോട്ടുകാവിൽ വേലയാറാട്ട് കാണാൻചെന്പപ്പോൾ അയാളുടെ മേയ്ക്കുട വഴി പാലോട്ടുദൈവം കുഞ്ഞിമംഗലത്തേക്കു എഴുന്നള്ളി.

ഈ കാവുകളിലെല്ലാം വൈഷ്ണവ സങ്കൽപ്പത്തിലുള്ള പാലോട്ട് ദൈവം തന്നെയാണ് ആരാധിക്കപ്പെടുന്നത്.
വടക്കെ മലബാറിൽ 5 കഴകങ്ങളിൽ ഈ തെയ്യം കെട്ടിയാടുന്നു.
അണ്ടലൂർദൈവം, ദൈവത്താർ, കാരൻദൈവം, എന്നീ പേരുകളിൽ അറിയപ്പെടുന്ന ദൈവങ്ങൾ വൈഷ്ണവ സങ്കല്പത്തിലുള്ള പാലൊട്ടു ദൈവം തന്നെയാണ്.

അഴിക്കോടു, കീച്ചേരി, അതിയടം, മല്ലിയോടു എന്നിവിടങ്ങള്‌ലുള്ള പാലോട്ടുകാവുകളിൽ മത്സ്യാവതര സങ്കല്പത്തിലുള്ളതാണ്.
എന്നാൽ അണ്ടലൂർ കാവിലെ അണ്ടലൂർ ദൈവം ശ്രീരാമവതര സങ്കല്പത്തിലുള്ളതാണ്.
പാലോട്ടു തെയ്യത്തിന്റെ കുടെയുള്ള തെയ്യക്കോലമാണ് കൂടെയുള്ളോർ.

എല്ലാ വിഷുവിനും ഈ തെയ്യങ്ങൾ 5 കഴകങ്ങളിൽ കെട്ടിയാടുന്നു.
കണ്ണൂരിലെ കല്യാശ്ശേരി കീച്ചേരി പാലോട്ടുകാവ് ക്ഷേത്രത്തിൽ സ്ത്രീകൾക്ക് കർശന നിരോധനമാണുള്ളത്.

ശാന്തതയും രൗദ്രതയും ചേർന്ന ഭാവം

വൈഷ്ണവ തെയ്യമായതുകൊണ്ട് തന്നെ പൊതുവെ ശാന്തമായ ഭാവമാണ് പാലോട്ട് ദൈവത്തിനുള്ളത്. എന്നാൽ അസുരനെ വധിച്ചതിന്റെ വീര്യവും രൗദ്രതയും തെയ്യത്തിന്റെ ചില ചുവടുകളിൽ പ്രകടമാകും.

• വേഷവിധാനവും ഗാംഭീര്യവും: അതിമനോഹരവും രാജകീയവുമായ വേഷവിധാനമാണ് പാലോട്ട് തെയ്യത്തിന്റേത്. സ്വർണ്ണവർണ്ണത്തിലുള്ള തിളങ്ങുന്ന വലിയ തിരുമുടിയാണ് ഈ തെയ്യം അണിയുന്നത്. മുഖത്ത് മഞ്ഞളും ചന്ദനവും കുങ്കുമവും ഉപയോഗിച്ചുള്ള പ്രത്യേകതരം മുഖത്തെഴുത്ത് കാണാം.

• ചടങ്ങുകൾ: മഹാവിഷ്ണു സങ്കൽപ്പമായതിനാൽ കടുത്ത വ്രതാനുഷ്ഠാനങ്ങളോടെയാണ് പാലോട്ട് കാവുകളിൽ ഉത്സവങ്ങൾ നടക്കുന്നത്. മത്സ്യത്തിന്റെ ചലനങ്ങളെ ഓർമ്മിപ്പിക്കുന്ന തരത്തിൽ, മുന്നോട്ടും പിന്നോട്ടും വേഗത്തിൽ ചാടിയുള്ള ചില പ്രത്യേക നൃത്തച്ചുവടുകൾ പാലോട്ട് തെയ്യത്തിന്റെ അവതരണത്തിൽ കാണാൻ സാധിക്കും. വാളും പരിചയുമാണ് ആയുധങ്ങൾ.

നാടിന്റെ ഐശ്വര്യത്തിനും, സകലവിധ ദോഷങ്ങൾ അകലുന്നതിനും, കാർഷിക-മത്സ്യബന്ധന മേഖലകളിലെ അഭിവൃദ്ധിക്കും വേണ്ടിയാണ് ഭക്തർ പ്രധാനമായും പാലോട്ട് ദൈവത്തെ പ്രാർത്ഥിക്കുന്നത്.